Како што знаеме во последно време трендот во индустријата на уредување на домот оди кон осветлување на просторот. Ако претходно трендот се бореше со отфрлање на венге бојата која доста време доминираше, сега се повеќе се оди кон визуелно полесен простор, со светли тонови. Ако минатата година преминот се правеше со тортора боја, најчесто во комбинација со виолетова (комбинација која навистина прилега), оваа година „ин“ е многу од белата боја. Може да се рече дека белата боја на тој начин останува боја на просторот, на позадината, а акцентот е на предметите во боја. Едноставен метод на акцентирање со боја, со кој никогаш нема да згрешите, а се постигнуваат значајни ефекти.

Она што доаѓа како комбинација со белата во овој концепт се јаки концентрирани бои кои привлекуваат внимание и делуваат во контраст со белата. Тоа е јака тиркизна боја, зелена, заситено портокалова…Пластиката (сјајна како и транспарентната) во комбинација со сјајната бела боја (на пр. бела кујна во висок сјај со бела трпезариска маса и тиркизни пластични столчиња) постигнува софистицирано модерен ефект и чувство на чистота.

Она што сакаме да нагласиме е дека многу често при осмислувањето на концептот на ентериерот се пренебрегнуваат деталите кои доаѓаат покасно. Уште во текот на градбата или реновирањето, многу луѓе трошат многу време на одбирање на вистинската боја на мебелот: почнувајќи од кујната, столиците, гарнитурата…сите тие бои треба да се усогласат и на крај да се добие задоволувачка целина. Она што често се заборава е дека не е само мебелот оној кој ја чини естетиката на ентериерот. Секогаш целосниот ефект на ентериерот се постигнува откога тој ќе стапи во функција. Дури и кога на мебелот се одбира најненеутрална боја, ефектот на обоеност може да се постигне со малите детали кои задолжително ги има во секој ентериер а никогаш не се земаат во предвид при проектирањето. Има подолу низ сликите неколку пример…во кујната секогаш имате предмети кои секојдневно ги користите, некаде во просторот сигурно има вазна за цвеќе или украси, држач за весници и списанија, ѕиден часовник, чајник кој везден стои на ринглата, мали и интересни садови за послужување кои најчесто стојат на масата во дневна кога ќе дојдат гости, сад за овошје на трпезариската маса.

Во таа смисла новиот тренд на белата боја комплетно се поклопува со оваа забелешка. Имајте светол и бел ентериер, а акцентирајте со малите работи во јаки бои. Одберете убав сад за овошје во заситена портокалова боја, дизајнирани шољи за кафе и чинии, часовник, слика, перничиња во боја, подметачи за масата, ефектен лустер. Не се оптеретувајте премногу со бојата на мебелот… направете го неутрален, а бојата нека ја носат деталите. Никогаш нема да згрешите…

Еве низ скица како би одело потенцирање на портокаловата боја низ ентериерот. Јаките бои на ногарката на масата воопшто не мора да се врзуваат со други бои во мебелот. Таа е доста ефектна и нема потреба да се претерува со колорит во останатиот дел. Напротив таа останува акцентирана ако позадината е неутрална. За сепак да има потег кој му дава боја на просторот, таа може да се појави во малите детали.

Потенцирање на жолтата боја низ ентериерот:

Или црвената:

Иако во почетокот обично не помислуваме на малите детали, тие се оние што му ја даваат душата и топлината на ентериерот.

Инспирирани од новата продавница за дизајнерски производи Kares во центарот на Скопје, малку подетално навлеговме во дизајнот кои тие го нудат и во консултација со нив, издвоивме некои предмети кои оставаат впечаток како со дизајнот така и со функционалноста…ако овие две работи всушност некогаш може да се разделат.

Neo колекцијата на тенџериња на белгиската реномирана компанија BergHOFF. Материјалот е не`рѓосувачки челик, а има 3-слојно дно. Тенџерето има специјално дизајниран дел на отворот што го олеснува директното турање од тенџере. Исто така на тој дел има капаче со дупки со кои можете многу лесно со затворен капак да ја истурите само течноста од тенџерето. Се мие во машина за садови и може да се употребува на секаков извор на топлина, а капакот кој исто така е од не`рѓосувачки челик може да се користи како подметач. И се тоа обединето во допадлив едноставен дизајн и огледална завршница на материјалот. Добитбик е на многу награди за дизајн: Good Design Award 2008, Henry Van De Velde award 2008, Henry Van De Velde award 2008 public, Red dot design award посебно признание 2008, Pulchra award.

Earthchef колекцијата која меѓу другото е и со многу пристапна цена. На овој сет за готвење материјалот е алуминиум, со облога од 6 пати појак од традиционалниот керамички слој. Големо внимание е обрнато на еколошката страна на оваа колекција: не содржи воопшто PTFE/PFOA, соединенија кои се покажале како штетни а ги има во тефлонот; комплетно може да се рециклира, не содржи олово, не содржи тешки токсични метали, емисијата на CO2 е доведена до минимум. Најубавото во врска со оваа колекција е што керамичкиот слој е не леплив, односно во овие садови можете да готвите и без зејтин.

Се мие и во машина за садови, може да се користи на индукциска плотна со што штеди енергија и издржува температури до 540 степени. И згора на се цената е пристапна: 1.195 денари дијаметар 20см и 1.595 денари дијаметар 26см.

Zeno колекција од не`рѓосувачки челик со револуционерно 6-слојно дно, обезбедува голема заштеда на енергија. Ергономски рачки и заоблен облик. 6-слојното дно овозможува здраво готвење: со минимум или без вода и пржење без путер или масло. На тој начин се задржуваат сите витамини, минерали и вкусови  Многу корисно за готвење диетална храна и храна без сол. Рачките остануваат ладни и кога тенџерето е загреано.

Подолу се некои од производите кои ги издојуваме како навистина иновативен, креативен и практичен дизајн. Некои работи кои ни недостигале а можеби не сме биле ни свесни:

Даска за сецкање која се прекршува така што турањето на исецканата храна станува полесно и не се расфрла наоколу.

Ренде кое можете да го држите од страна (а не одозгора), а по употребата се склопува и не мора да смислувате посебно место за него. Го собира заедно со другиот прибор – во фиока 

Лажицата за готвење и работната површина остануваат неизвалкани кога лажицата има посебно подигање со чија помош не ја допира работната површина.

И садот за лед кој кога сакате да извадите една коцка лед, стискате едно копче и паѓа само таа коцка што ја сакате.

Ова е уште една колекција од водечка италијанска компанија за добар дизајн. Акцентот во материјалите е на пластиката (различни видови полимерни соедниненија) која изгледа не само цврсто туку дава и неодолив обоен сјаен ефект. Уживајте…

Престојувајќи во новиот хотелот Pantone, ќе го доживеете Брисел преку објективот на боја и спектар. Од моментот кога ќе пристигнете, “хотел на бои” ќе ги разбуди вашите сетила. Тоа е шарено и живописно место за престој. Хотелот е централно лоциран само чекори од Avenue Louise, нај гламурозната шопинг и бизнис-област.

Дизајнот е на белгискиот дизајнер Michel Penneman и белгиски архитект Oliver Hannaert.
Постојат вкупно 59 соби и апартмани во седум различни бои палети.

Палетата на бои на PANTONE употребена во дизајнот на столчињата.

Фотографија од барот и салата за состаноци. Двата простори решени со бела боја како позадина, модерен дизајн на пластичните столчиња и контраст со јаки бои.

Од перспектива на дизајнот, хотелот Pantone е изграден со употреба на контрасти: бело платно кое обезбедува чист простор со заситени бои од поп музиката. Целта на дизajнерите на овој хотел им е да ги привлечат гостите со тоа што ќе можат да си одберат боја на соба која одговара на нивното расположение.

Собите имаат фотографски инсталации креирано од познатиот белгиски фотограф Виктор Леви кои вклучуваат спектар на бои Pantone да создаде уникатен амбиент во секоја соба. Високите прозори од подот до плафонот го прават просторот поголем и по осветлен.

Уште еден хотел, најново остварување на шпанскиот дизајнер Patricia Urquiola. Ако имате прилика да патувате за Барселона наскоро, сигурно посетете го. Исклучителен дизајн!

Барселона е град со богата архитектонска историја и страст кон авангардното. Оваа комбинација е оживотворена во нејзиниот нов луксузен хотел, Mandarin Oriental. Лоциран е во луксузниот Passeig de Gràcia, во центарот на градскиот комерцијален и забавен дистрикт, во непосредна близина на значајни архитектонски дела од историјата на Шпанија. Неговиот фасцинантен дизајн се должи на три главни фактори: централната локација на Passeig de Gràcia, добрата зачуваност на зградата на банката која сега е пренаменета во луксузен хотел и дизајнот шпанскиот дизајнер Patricia Urquiola, одговорна за дизајнот на овој хотел со 98 соби, како и за голем дел од мебелот во него.

Патеката на дизајнот започнува веќе од самиот влез на хотелот. Од улицата се гледа само предната фасада на објектот и не знаете дека ве очекува изненадување. Ве очекува осветлена рампа која лебди низ повеќевисинскиот атриум на хотелот (внатрешен двор каков што се сретнува во блоковите на Барселона). Со рампата која благо се подигнува до самиот влез стигнувате пред вратата која служи за просторно одделување на фоајето од атриумот, а дозволува визуелен контакт. Мотивот на вратата можеме да го забележиме како се провлекува низ целиот ентериер потсетувајќи на Мudejar стилот, карактеристичен за историјата на Шпанија како спој од повеќе култури и начини на градење и декорација.
Целата декорација во ентериерот, вклучувајќи ја обработката на ѕидовите, плафонот и подовите се надополнуваат една со друга и градат модерна слика, инспирирана од шпанската традиција, преточена во современа естетика.

Просторниот концепт, дизајнот на ентериерот вклучувајќи го мебелот, декорациите на плафонот и прекрасните рачно-изработени килими е лично одбран од дизајнерот Patricia Urquiola. Скоро целиот мебел специјално е дизајниран за овој ентериер во соработка со големите компании за мебел како Moroso, Flos и DePadova. Од фотељите со скандинавски стил во Moments ресторанот, софите во лобито, килимите, па се до реставрираните маси од францускиот ран 20-ти век во Blanc ресторанот, секое парче е внимателно одбрано за совршено да го дополнува карактерот на ентериерот.

„Blanc“ ресторанот постојано се споменува по медиумите, како еден од најпопуларните ресторани изминатава година. Spa-центарот во Mandarin Oriental, Barcelona продолжува да добива најдобри критики, заедно со добрата услуга и фантастичната локација. Додека другиот ресторан на хотелот „Moments” добива Michelin ѕвезда, што го лансира како интернационална гурмет дестинација.
Кујната ја дефинираат овие два ресторани: „Blanc“ специјализиран за азиска храна и „Moments” посветен на нео-традиционалната Каталанска кујна.

Целта на овој хотел не е да биде само место на концентрација на гости, туку и на граѓаните на Барселона, за чие секојдневно задоволство постои Banker Барот и возбудливото место на кровната тераса на хотелот со базен и со најубавите погледи на градот.

Ходникот кој ги поврзува собите се осветлува преку отвори кон атриумот, а навечер секој од нив е осветлен со скриено светло и кога ќе погледнете нагоре од рампата добивате интензивно визуелно доживување, кое може дури и да се искористи како симбол/лого на хотелот.

Хотелот има 98 соби, со дизајн во нијанси на крем и бело, со авангарден мебел за седење сместен покрај ориентални детали. Подови од светол даб и пространи килими во беж нијанса кои им даваат топлина на собите, дополнети со просторно дименизонирани бањи.
Бањите се опремени со Axor Urquiola, колекција на санитарии од самиот водечки дизајнер на хотелот Patricia Urquiola.

Минималистичка естетика е евидентна во Spa-делот на овој хотел. Доминираат детали од темно дрво, црн плафон, бел под и природниот изглед на влажниот камен. Металик завеси ги водат гостите до декоја од осумте просторни соби за третман.

Хотелот е добитник на следниве награди за дизајн:

- Најдобар бизнис хотел – Wallpaper Magazine Design Awards
- Најдобар градски хотел – Tatler Travel Guide, 2011
- Најдобар ресторан (за ресторанот „Blanc” во рамки на хотелот) – European Hotel Design Awards 2010
- За ресторанот “Moments” во рамките на хотелот – 1st Michelin Star (International), 2011
- Најдобар прием – Interior Design Magazine (US), 2010
- Најдобар дизајн – Senses Magazine (Germany), 2010

Во рамките на гигантот „W Hotels Worldwide” оваа година почнува со работа новиот „W Retreat & Spa – Vieques Island“, 37-ми хотел на компанијата и прв retreat центар во рамките на Северна Америка. W Vieques е лоциран 10-тина километри од југоисточниот брег на Порто Рико. Стартува со работа како втор retreat центар на W-ланецот хотели, следејќи го веќе успешниот прв W retreat центар на Малдивите, изграден 2006.

Сместен на сеуште неоткриениот Vieques остров, овој хотел нуди уникатно патувачко искуство, поради миксот на докажаниот софистициран стил на брендот и воодушевувачката убавина на природата на островот. Гостите секако можат да избегаат од своето секојдневие, но ова би било буквално „бегање во рајот“.
Хотелот е дизајн на моментално многу популарната шпанска дизајнерка Patricia Urquiola. Ако го побарате нејзиното име, ќе го најдете потпишано на многу од луксузните парчиња мебел за италијанските култни фирми “Moroso” и „B&B Italia“. Patricia Urquiola родена во Шпанија, завршува архитектура и дизајн во Милано и од тогаш нејзиното Studio Urquiola е сместено во Милано. Работи повеќе во областа на индустрискиот дизајн и тоа многу успешно, а нејзините два последни проекти се најсериозни по обем, вклучувајќи целосно проектирање на два хотели, заедно со целосно осмислување на ентериерот. W Vieques е едниот од нив!

Штом гостите пристигнат во „W Retreat & Spа“ веднаш ќе ја почувствуват рустичната елеганција на дизајнерката, која умешно ги споила природните и локални елементи во модерна оаза. Дизајнот на сегменти од хотелот како „W Hotel Store“ и „Spa Chakra“ е изработен во соработка со Rockwell Group Europe – архитектонско и дизајн студио од Мадрид, а landscape (пејзажното) решение е изработено во соработка со EDSA.
Дизајнот на хотелот е инспириран од природните феномени на островот колку и од современиот стил на W-хотелите. Низ целата површина се огледува доследно внимание обрнато на деталот и изработката, во комбинација со локални рециклирани материјали, органски форми и мебелот (дизајн на Patricia Urquiola) изработен од „B&B Italia“ специјално за W Vieques хотелот. Делот на рецепцијата е целиот обработен во природно дрво, служејќи како портал кон „W – Дневната Соба“ каде седењето го прави комфорно Field софата на Moroso со пердувести разнобојни перници, црни кожни столици и великодушно димензионирани метални лустери со текстилни абажури од истиот материјал како и платната кои служат како декорација на плафонот и ѕидовите.

Гостите можат да уживаат и во надворешниот дел, во погледите кон океанот, кои можат непречено да ги впиваат додека седат покрај драматично огниште.

Хотелот има 157 соби, сите уредени со стил, со приватни пациа и балкони кои овозможуваат широки погледи кон песочните плажи и кристално чистата вода. Има повеќе типови на соби, сите со различен дизајн така што можете да изберете: „Tropical Oasis“, „Pool Oasis“, „Spectacular Ocean View Oasis“, „Fabulous Ocean Front Escape“, „Fantastic Garden Retreat“, „WOW Ocean Front Retreat“. Сите се уредени со префинетиот стил на дизајнерот, вклучувајќи и парчиња мебел кој се лично нејзин дизајн. Се појавуваат доста различни бои, а нивното усогласување е тоа што воодушевува и го прави дизајнот модерен и елегантен.
Собите се просторни, по површина ги има од 50-130м2, сите инспирирани од тропската околина на островот. Нијанси на земјена и беж боја акцентирани со јаки бои и принтови се поставени наспрам камената облога на ѕидовите (повторно дизајн на Patricia Urquiola) и сјајните темно сиви подови. Едно од најуникатните парчиња на Patricia, повторно преточување на рустичната природа во современ дизајн е Vieques кадата, изработена од боен метал крунисана со распрснувачки капки од тушот.

Fantastic Garden Retreat

Tropical Oasis

Marvelous Retreat Bedroom

Во хотелот што се однесува до забавата, можете да најдете се што нуди еден современ луксузен хотел и уште повеќе од тоа!
„МiX on the Beach“ е ресторанот во рамки на хотелот воден од Alain Ducasse, светски познатиот француски кулинар кој дрќи ланец на ресторани за органска храна, но за целите на хотелот рецептите се прилагодени кон локалната храна.
Спа, базени, продавници и се што ќе посакате, вклучувајќи го и Whatever/Whenever сервисот (Билокога/Билошто сервис). Велат дека дури и нешто да ви недостига ќе го обезбедат за вас, се што ќе посакате, се додека е легално 

Нов и единствен, современ стол со иновативно графичко решение. Ова решение е возможно само благодарение на иновативен систем на производство, патентиран и ставен во употреба за изведување на овој стол. BIG BANG е изведен со седало во повеќебоен технополимер и метални ногарки, хромирани или во бела боја. Погледнете ги комбинациите на бои

Столот Big Bang е дизајн на Stefano Sandona, кој за овој стол има добиено GOOD DESIGN AWARD 2010, ја доделува Музејот за архитектура и дизајн во Чикаго, секоја година.

Го има во Домиталиа, во центарот на Скопје, се информиравме за цената, 7.348 денари.

Освен интересното „пикселирано“ графичко решение, она што е специфично единствено за овој стол е делот од „пикселите“ кој на самиот врв, излегува надвор од столот.

Отворен во 2006 година, со капацитет од 497 соби, овој ресорт е „Concept and Design hotel“, дизајн на архитектот и ентериер дизајнер Ерен Талу. Хотелот е негова најнова верзија на минимализам, лоциран е во преубава борова шума, покрај море. Со многу награди за дизајн, Adam & Eve е прогласен за најдобар хотел во светот за 2007,2008,2009 и 2010, најдобар Европски хотел, најдобар хотел во Турција и уште ред други награди од Fashion TV, Gala Magazine, World Luxury Hotel Awards и др.

Она што останува во сеќавање како тема на дизајнот е употребата на огледала, големи стаклени панели и беспрекорно бели површини.
„Нашата цел беше да се спојат морето, песокот и сонцето со забава, се она што ни паѓа на ум кога ќе помислиме на одмор. Презентиравме ексклузивна визија за одморот, за екслузивни клиенти. Создадовме соби кои го материјализираат спокојот на белата боја, светлината на транспарентниот допир и бескрајниот спектрум на боите на светлината. Сакавме да им понудиме на нашите гости лајфстајл на чистота и луцидност. Затоа што сонувавме за „рај на земјата“ работевме многу напорно и го остваривме сонот, во Белек – Анталија.“

Собите се постмодерни уметнички дела. Почнувајќи од мекиот бел под и огледалата кои се појавуваат како тема низ ентериерот, доживувањето е визуелно провокативен дизајн. Сензуалноста е во фокусот, со луксузна елиптична када за двајца во центарот. Сетилата за допир, за вид, за слух се заведени од Adam &Eve, овозможувајќи им на гостите единствена атмосфера со помош на системот за осветлување во секоја соба.

Апартманите во приземјето имаат сопствен базен.

Хотелот има 7 базени, вклучувајќи внатрешни и надворешни базени. Низ целиот хотел можете да нарачате „ангелска услуга“, бидејќи нели ова е хотелот од Рајот

Гостите можат да се опуштат со аеробик на вода, сауна, џакузи, солариум спа-третмани…Се прашувате како изгледа сауната? Атмосферата на целосно обоен амбиент не недостасува и тука.

Можете да претпоставите дека организираните активности за забава на гостите во овој хотел не се потценети. Летечки клуб, тандем скокање, планинарење, јавање, сурфање и секакви други споротви се само дел од она што овој хотел го нуди.

Нашата екипа во рамките на „Ноќ на музеите“ во Белград (настан кај нас познат како „Бела ноќ“) ја посети зградата на Советот на Извршната Влада (SIV – Savez Izvrshnog Veca ). Иако ова е заборавено здание, непознато за младите генерации, нас не фасцинираше со својата безвременост. Конкурсот за зградата е објавен во 1947, а завршена е во 50-тите години. Трогнува со својот дизајн и концепт уште повеќе што тоа е направено пред 60 години.

Формите, изборот на материјали, обработката на површините и концептуалната осмисленост на просторот се доведени до совршенство. Секој детал со смислена реторика на соодветното место. Доколку се занемари излитеноста на материјалите која е нормално да се појави по толку години користење, тој би бил совршен ентериер работен во ретро стил дури и денес. Помислата дека ова е изведено пред 60 години навистина шокира.

Еве мал историјат ако ве интересира и уживајте во фотографиите:
За некои познатa како СИВ 1, денес се повеќе е позната како Палата на Србија. Изградбата на оваа зграда е започната во 1947/48 година. Проектот го има направено 4-член тим на загребски архитекти: Владимир Поточњак, Антон Урлих, Златко Најман И Драгица Перац. Проектирана е во форма на буквата Н и опфаќа површина од 5.500м2. Во дизајн на ентериерот учествувале тогаш најпознатите уметници Петар Лубарда, Мило Милуновиќ, Ѓорѓе Андреевиќ – Кун. Се издвојуваат мермерните скулптури на Сава Сандиќ, фонтаната изведена во мозаик, итн. Во ентериерот се издвојуваат посебните целини, кои претставуваат некој вид на микромузеј на секоја од Југословенските Републики.
Во палатата има околу 1000 канцелариски простории. Пред средното крило се наоѓа понизок дел покриен со стаклена купола, каде се наоѓа свечената дворана наменета да прими до 2000 луѓе.

Штандот на Doimo Salotti, на Саемот во Милано 2011. Претставени се сите нови модели. Doimo Salotti е бренд од групацијата Doimo, специјализиран исклучиво за софи изработени во штоф. За оние кои се плашат околу одржувањето на штофот на гарнитурата, мораме да спомнеме дека овде можноста штофот да се вади за перење е стандард.

Нема да најдете ниеден модел кај кој пресвлеката не е на лепенки за да може да се извади и да се испере. На штандот не упатија малку во новитетите во однос на штофовите: веќе знаевме за штофови на кои не остануваат дамки, но не знаевме дека има и штофови со посебен ефект против инсекти.

Уживајте во сликите

Како што ветивме, во следните неколку постови ви ја пренесуваме атмосферата од Саемот во Милано 2011. Ова е штандот на Bonaldo, со новите производи за 2011 година. Чувствувајте се како да сте биле таму

И неколку слики од штандот.